Daga Usman Usman Garba
‘Yan kasuwar da gobarar da ta shafa a Kasuwar Singer da ke Jihar Kano ta sun sake yin kira ga Gwamnatin Jihar Kano da ta Tarayya da su cika alkawuran da suka yi na tallafa musu.
‘Yan kasuwar sun ce jinkirin da aka samu na tsawon watanni yana kara jefa wadanda lamarin ya shafa cikin matsala, musamman wajen farfado da sana’o’insu da kuma dawo da hanyoyin samun abincinsu.
Sun bayyana cewa watanni da dama bayan faruwar gobarar, da dama daga cikinsu har yanzu suna fama da matsalar rashin jari, kayayyaki da sauran kadarorin da suka rasa.
Wasu daga cikinsu kuma sun ce har yanzu ba su samu damar komawa gudanar da harkokin kasuwancinsu yadda ya kamata ba.
Shugaban ‘yan kasuwar da lamarin ya shafa, Alhaji Kabiru Ado Garo, ne ya yi wannan kiran yayin da yake zantawa da manema labarai.
Ya ce wadanda gobarar ta shafa suna bukatar tallafi na zahiri da zai taimaka musu wajen farfado da kasuwancinsu bayan dimbin asarar da suka yi.
A cewarsa, gobarar ta lalata kadarorin kasuwanci na miliyoyin nairori, lamarin da ya bar ‘yan kasuwa da dama ba tare da jarin da za su sake cike shaguna da kayayyaki ba.
Ya ce duk da cewa hukumomi sun yi alkawarin tallafa wa wadanda lamarin ya shafa, har yanzu ba su samu tallafin da aka yi musu alkawari ba.
Garo ya bukaci Gwamnatin Jihar Kano da ta Tarayya da su gaggauta duba halin da wadanda lamarin ya shafa suke ciki, tare da samar da wani shiri na farfado da kasuwancinsu, wanda zai hada da tallafin kudi, basussuka masu saukin biya da sauran hanyoyin tallafi.
Wasu daga cikin ‘yan kasuwar sun kuma yi kira ga kungiyoyin agaji, masu hannu da shuni da sauran al’umma masu kishin kasa da su taimaka musu, suna cewa irin wannan tallafi zai taimaka wa dubban iyalai da gobarar ta yi wa hanyoyin samun abinci illa.
‘Yan kasuwar sun jaddada cewa cika alkawuran da gwamnati ta yi a baya ba kawai zai rage musu radadin halin da suke ciki ba, har ma zai ba su damar komawa harkokin kasuwanci tare da sake dogaro da kansu ta fuskar tattalin arziki.
