Daga Shu’aibu Ibrahim Gusau
Karamin Ministan Tsaro, Hon. (Dr.) Bello Muhammad Matawalle, ya yi alkawarin ci gaba da aiki tukuru tare da shugabannin jam’iyyar All Progressives Congress (APC) a Jihar Zamfara domin karfafa jam’iyyar da kuma tunkarar kalubalen da ke gabanta.
Matawalle ya bayyana hakan ne ranar Litinin, 14 ga Satumba, 2026, lokacin da shugabannin jam’iyyar APC na Jihar Zamfara suka kai masa ziyarar girmamawa a gidansa da ke Abuja. Tawagar ta samu jagorancin Shugaban Jam’iyyar APC na jihar, Hon. Kabiru Moyi Birnin Magaji.
A cewar wata sanarwa da Sakataren Yada Labarai na APC na Jihar Zamfara, Hon. Ibrahim Muhammad (Danmadamin Birnin Magaji), ya fitar, Matawalle ya ce a matsayinsa na mai bayar da gudummawa wajen karfafa jam’iyyar a jihar, ya zama wajibi mambobin APC su mutunta shugabancin jam’iyyar.
Ya bayyana cewa ci gaban kowane dan jam’iyya yana samuwa ne ta hanyar jam’iyyar, don haka ya bukaci shugabannin jam’iyyar da su mayar da martani ta hanyar yin aiki tukuru ba tare da nuna son kai ba, domin tabbatar da nasarar APC a jihar.
Ministan, wanda kuma shi ne Daraktan Kayan Aiki da Ayyuka na Majalisar Yakin Neman Zaben Shugaban Kasa ta APC ta 2027, ya bayar da gudummawar naira miliyan 100 a matsayin tallafin kudi ga jam’iyyar.
Ya kuma yi alkawarin samar da karin kayan aiki domin taimakawa wajen gudanar da harkokin jam’iyyar yadda ya kamata a Jihar Zamfara.
Da yake jawabi a yayin ziyarar, Shugaban APC na Jihar Zamfara, Hon. Kabiru Moyi Birnin Magaji, ya ce manufar ziyarar ita ce gabatar da sabbin shugabannin zartaswar da aka zaba ga Ministan a hukumance, tare da gode masa bisa rawar da ya taka wajen kafa da karfafa shugabancin jam’iyyar.
Ya jaddada muhimmancin ci gaba da samun goyon bayan tarbiyya, kudi da kayan aiki daga Ministan, da sauran shugabanni da masu ruwa da tsaki, yana mai cewa hakan na da matukar muhimmanci wajen tafiyar da harkokin jam’iyyar.
Hon. Kabiru Moyi Birnin Magaji ya kuma yi alkawarin kare mutunci da darajar shugabannin jam’iyyar a kowane lokaci.
Ya bayyana cewa sabbin shugabannin za su yi aiki tare da dukkan masu ruwa da tsaki, tare da mayar da hankali wajen tabbatar da nasarar jam’iyyar a ayyukan da ke gabanta.