Daga Rabiu Sanusi
Shugaban Rukunin Kamfanonin Gerawa Group, Alhaji Dr. Ibrahim Muhammad Gerawa, ya yaba wa Gwamnan Jihar Kano, Alhaji Abba Kabir Yusuf, bisa yadda gwamnatinsa ke samar da yanayi na zaman lafiya da kuma inganta harkokin kasuwanci a jihar.
A wata hira da ya yi da manema labarai, Dr. Gerawa ya bayyana cewa salon mulkin gwamnan ya taimaka matuƙa wajen inganta harkokin kasuwanci da kuma tattalin arzikin jihar, wanda hakan ya ba wa kamfanoni damar faɗaɗa ayyukansu.
Ya ce, irin wannan yanayi na kwanciyar hankali ya sa kamfaninsu ke samun damar yin aiki cikin sauƙi tare da hukumomin gwamnati domin faɗaɗa harkokinsu a sassa daban-daban.
“Cikin ‘yan shekaru kaɗan, kamfaninmu ya kasance cikin na farko da ke amsa kiran gwamnati, muna kuma aiki kafada da kafada da hukumomin jihar wajen faɗaɗa harkokin kasuwancinmu,” in ji shi.
Dr. Gerawa ya jaddada muhimmancin haɗin gwiwa tsakanin gwamnati da ‘yan kasuwa, yana mai cewa Gerawa Group na gudanar da ayyukansa a wurare fiye da bakwai a fadin jihar Kano.
Ya nuna kwarin gwiwa cewa irin wannan haɗin gwiwa zai ci gaba da taimakawa wajen samar da ci gaban tattalin arziki mai ɗorewa.
Dangane da farashin kayayyakin masarufi, ya bayyana cewa farashin kayan abinci musamman shinkafa ya ci gaba da kasancewa daidai duk da ƙalubalen tattalin arzikin duniya.
Ya tabbatar da cewa kamfanin na sayar da kayayyakinsa da farashi mai sauƙi tare da kula da jin daɗin ma’aikata.
“Babu wani ma’aikaci da ke karɓar ƙasa da Naira 70,000 a kowane wata, har ma kafin ƙarin albashin da gwamnati ke bayarwa,” in ji shi.
Haka kuma, ya yi bayani kan ƙalubalen da manoma ke fuskanta, musamman waɗanda suka noma a shekarun baya, inda ya ce ribar da suke samu ba ta da yawa, wanda ke nuna bukatar tallafin gwamnati.
Ya yi kira ga gwamnatin Kano da sauran gwamnatocin jihohin Arewa da su haɗa kai wajen samar da kayan aikin noma masu sauƙin samu domin taimaka wa manoma su samu ci gaba.
Ya ce irin wannan haɗin gwiwa zai taimaka wajen ƙarfafa al’umma su dogara da kansu.
Dr. Gerawa ya sake jaddada ƙudirin kamfanin na gudanar da ayyukan jin ƙai, inda ya ce manufarsu ba kawai cin riba ba ce, har ma da tabbatar da cewa kayan abinci musamman shinkafa suna isa ga jama’a cikin sauƙi.
Ya kuma bukaci shugabanni da su haɗa kai wajen magance matsalolin tattalin arziki domin inganta rayuwar al’umma.
Ya bayyana cewa haɗin kan shugabanni shi ne hanya mafi kyau ta tabbatar da cewa babu wanda aka bari a baya.
Kamfanin Gerawa Group, wanda ya fara a matsayin harkar kasuwancin mai, yanzu ya faɗaɗa zuwa gine-ginen hanyoyi, samar da shinkafa, noma da kuma ci gaban ababen more rayuwa.
A ƙarshe, ya bayyana wasu ƙalubale da ke fuskantar ‘yan kasuwa, ciki har da yawan haraji, ƙarancin wutar lantarki da tsauraran dokokin gudanarwa, inda ya yi kira ga gwamnati da ta magance su domin bunƙasa kasuwanci a jihar Kano.
