Daga Rabiu Sanusi
Tsohon Kwamishinan Jihar Kano kuma kwamishina mai jiran gado, fitaccen ɗan siyasa daga ƙaramar hukumar Dala, Hon. Ibrahim Namadi Dala, ya bayyana cikakken aniyarsa na tabbatar da nasarar sake zaɓen Gwamnan Jihar Kano, Alhaji Abba Kabir Yusuf, a zaɓen shekarar 2027.
Namadi Dala ya bayyana hakan ne yayin wata hira da wakilan GIDA-GIDA Reporters jim kaɗan bayan wata muhimmiyar ganawa ta sulhu tsakanin masu neman takarar kujerar Majalisar Wakilai ta Tarayya daga mazabar Dala.
An gudanar da taron ne bisa jagorancin Gwamna Yusuf domin ƙarfafa haɗin kai da inganta fahimtar juna tsakanin masu ruwa da tsaki na jam’iyya gabanin shirye-shiryen siyasa masu zuwa.
Da yake magana cikin ƙwarin gwiwa yayin hirar, tsohon kwamishinan ya ce yana nan daram wajen mara wa gwamnatin Gwamna Yusuf baya tare da tallafa wa makomarsa ta siyasa, yana mai bayyana gwamnan a matsayin shugaba mai salon mulki da ke ci gaba da ba talakawan jihar Kano fata da kwarin gwiwa.
A cewarsa, kyakkyawar alaƙa da girmama juna da ke tsakaninsa da Gwamna Yusuf na daga cikin manyan ginshiƙan biyayyarsa da goyon bayansa ga gwamnan.
“A wannan lokaci babu abin da zan ce face godiya ga Allah Maɗaukakin Sarki bisa kyakkyawar alaƙa da fahimtar juna da ke tsakanina da Mai Girma Gwamna Abba Kabir Yusuf,” in ji shi.
Namadi Dala ya ƙara da cewa biyayyarsa da ƙaunarsa ga Gwamna Yusuf sun ƙara bayyana lokacin da gwamnan ya sauya tafiyar siyasarsa daga jam’iyyar NNPP zuwa APC, yana mai cewa bai yi wata-wata ba wajen binsa a siyasance.
“Duk inda Gwamna ya dosa a siyasance, a nan ne matsayina yake. Tafarkin siyasarsa shi ne tafarkina saboda irin amincewa da ƙwarin gwiwar da nake da ita kan jagorancinsa,” in ji shi.
Tsohon kwamishinan ya bayyana Gwamna Yusuf a matsayin shugaba na musamman wanda jajircewarsa wajen kula da jin daɗin talakawa ya bambanta shi da sauran shugabannin siyasa na wannan zamani a ƙasar nan.
“Samun shugaba irin Gwamna Abba Kabir Yusuf wata babbar ni’ima ce kuma wata gagarumar dama ta siyasa ga al’ummar Kano. Kowane talaka yana buƙatar shugaba mai fahimtar halin da yake ciki kuma mai aiki domin cigabansa,” ya ƙara da cewa.
Ya kuma tabbatar wa magoya bayan jam’iyya da al’ummar jihar Kano cewa zai tattara duk wata kafa ta siyasa, magoya baya da duk wata dama da Allah ya ba shi domin tabbatar da nasarar Gwamna Yusuf a zaɓen gwamna mai zuwa.
“Zan yi duk mai yiwuwa domin tabbatar da cewa Gwamna Abba Kabir Yusuf ya samu gagarumar nasara a zaɓen 2027, In Sha Allah,” kamar yadda Namadi Dala ya tabbatar.
Da yake waiwaye kan wasu ƙalubalen siyasa da suka gabata, tsohon kwamishinan ya amince cewa wasu abubuwan da suka faru tsakaninsa da wasu abokan siyasa da ‘yan kwangila sun koya masa darussa masu muhimmanci game da amana, biyayya da dabarun siyasa.
Ya ce wannan ƙwarewar ta ƙara masa fahimta da basira wajen mu’amala da mutanen da ke kewaye da shi, musamman waɗanda ya bayyana a matsayin masu anfani da siyasa da maciya amana.
“Abin da ya faru a baya ya zama darasi a gare ni. Ya taimaka min wajen fahimtar irin mutanen da ya kamata a guje musu da kuma irin matakan siyasa da ya kamata a ɗauka cikin hikima a nan gaba,” ya bayyana.
Namadi Dala ya kuma sake jaddada aniyarsa ta ci gaba da kasancewa cikin siyasa tare da neman muƙaman zaɓe domin ci gaba da bayar da gudunmawa wajen bunƙasa ƙaramar hukumar Dala da jihar Kano da ma Najeriya baki ɗaya.
Ya bayyana cewa burinsa na siyasa ba wai saboda son rai kawai ba ne, illa domin hidimtawa al’umma da inganta rayuwar jama’a.
Masu lura da al’amuran siyasa na ganin cewa wannan taron sulhu da kuma fito-na-fito da Namadi Dala ya yi wajen bayyana biyayyarsa ga Gwamna Yusuf na iya ƙara ƙarfafa tasirin siyasar gwamnan a Kano gabanin zaɓen 2027, musamman a yankin Dala wanda ake kallon sa a matsayin ɗaya daga cikin yankunan siyasa mafi tasiri a jihar.
